Кое е вашето омилено животно од Зоолошката градина – Скопје? Дали знаете како се вика, колку години има, од која земја потекнува и кога за првпат бил донесен тој вид, таа единка кај нас? Нашата Зоолошка постои од 1926 година и низ годините се развивала просторно, а растел и бројот на животните. Денес при посетата на Зоолошката градина можете да се запознаете со стотици разновидни единки, а секоја од нив крие посебна судбина.

„Слободен печат“, низ овој серијал, кој го нарековме „Лична карта на жителите на ЗОО Скопје“, ќе се обиде да ви ги доближи нивните приказни, нивните карактери и чувства. Ќе се обидеме да ви овозможиме да дознаете што јадат и која е нивната омилена храна, ќе дознаете нешто ново и забавно, поврзано со омилените сожители во главниот град.

Нилскиот коњ Буцо е роден овде во Скопје пред 21 година. Тежи 2,8 тони, и претставува вистинска атракција за посетителите. Тој е многу дружељубливо животно, може да имате интеракција со него, знае да возврати на вашата комуникација на негов начин, а за оние кои се поигруваат и се потсмеваат со него има посебна „казна“.

– Буцо е многу интелигентен, јас понекогаш се радувам кога ќе видам како знае да  ѝ се „одмазди“ на лошата публика што го мава со разолични работи и го задева, така што ќе им го сврти задникот и ќе ги „почести“ со измет. Вака кога го гледате ќе си речете: „леле ама е голем“, а во суштина тој е едно големо бебе. Многу е паметен и мил – вели за „Слободен печат“ ЗОО негувателката Билјана Дрнковa.

Судбината на Буцо била таква тој да живее одвоен од мајка му, која денес живее во Зоолошката во Битолa.

– Стравувавме од инцест, затоа беше одлучено да ги раздвоиме. Тој до последен момент беше приврзан за мајка му, вистински „Балканец“, првите денови тагуваше откако остана сам. Денес тој е многу приврзан за мене, мислам дека ме слуша и чувствува уште кога влегувам во капија. Имам посебна комуникација со него, понекогаш мислам дека ме гледа со тие убави очи и како сака да го кренам во раце. Во тие моменти посакувам некој магионичар или да го смали него или да ме направи џиновска мене – рече таа.

Целото видео за Буцо погледнете го во продолжение: