На 20 јануари, претседателот Доналд Трамп донесе неколку извршни наредби, а една од нив се однесуваше на меѓународната помош (УСАИД), за која кажа дека не се вклопува со американските вредности и интереси, а американските вредности и интереси се сменија со неговото доаѓање на власт, вели Димитар Николовски од Евротинк.

– Претседателот Трамп се обидува да направи целосна реконструкција и трансформација на американското оптество, во еден многу конзервативен стил. Три месеци ќе бидат замрзнати средствата, освен неколку исклучоци, Израел и Египет за воена и хуманитарна помош, но и за некои медицински теми како што се лекови неопходни за живот, храна, домување, но од медицинските цели некои теми мора да се откажани, како абортус, семејно планирање, „џендер“ т.е. родовите теми итн. – вели Николовски.

Тој вели дека по три месеци, родовите прашања и климатските промени во кои голем дел од републиканците не веруваат дека се причинети од човечки фактор, ќе бидат трајно откажани за УСАИД.

– Една од извршните наредби на Трамп беше да дефинира дека постојат два пола. Јас би рекол дека Америка зазема друг правец. Оваа нова американска политика мора да признаам дека создаде голема конфузија во меѓународната помош во невладиниот сектор и многу проекти кои се започнати се откажани или се бара да се каже дека не се поддржани од УСАИД. Дури и средствата кои лежат на сметките на одредени здруженија сега не смеат да се користат – додава Николовски.

Тој вели дека во САД постои мошне жива дебата околу контроверзната иницијатива 20/25, финансирана од Фондацијата „Херетиџ“, од која Трамп официјално се има оградено.

– Планот 20/25 предвидува една балканизација на американската политика, во смисла дека партијата на власт ќе има многу поголем удел во вработувањето на луѓето. Професионалците ќе бидат тргнати, а ќе има многу повеќе партиски луѓе, како и поголема поддршка на фосилните горива, укинување на медицинското осигурување, абортусот, правење на порнографијата нелегална, со миграцијата и промената на половите се прави една целосна трансформација. Покрај таа внатрешна трансформација, гледаме дека тоа се рефлектира и кон надвор – смета Николовски.

Една од работите кои први ќе се почувствуваат во трансформацијата на американското општество ќе биде депортацијата на нелегалните мигранти, кои според некои проценки ги има 13 милиони.

– Приоритет на почетокот ќе бидат мигрантите со криминално досије, меѓутоа тоа може да има огромен ефект врз економијата на државата, бидејќи тоа се луѓето кои работат во земјоделството, во фабриките и тешко би можела да се пронајде нивна замена – додава Николовски.

Голема промена во односот на САД би можело да се очекува во односите со НАТО.

– Трамп побара од другите членки на НАТО да одвојуваат 5 отсто од својот БДП на одбрана. Тој се заканува дека доколку тоа не биде остварено, Америка ќе ги повлече своите гаранции за безбедност – вели Николовски, кој додаде и дека гласачите на Трамп на НАТО гледаат како на непотребен трошок, а во поглед на конфликтот во Украина, тие повеќе ја почитуваат позицијата на Русија – додава тој.

Николовски смета дека ЕУ ќе мора да се сврти самата кон себе во претстојниот период, а што се однесува до Македонија и до регионот, тој тврди дека влијанието на САД се очекува да падне на многу ниско ниво.