Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини… се само дел од ликовите што ќе бидат дел од нашиот серијал.

Во оваа епизода на серијалот ви ja претставувамe Цветанка Бурзевска. Таа е млад лиценциран психолог, специјализирана е во гешталт и арт психотерапија и веќе 12 години работи со клиенти, индивидуално и во група.

Посветена кон клиентите со потреба да ги разбере нивните емоции и да ги упати преку визуелна експресија, разговор, водење дневник, започнала да пишува индивидуални психолошки текстови за личен раст и развој, кои ги користи за свои потреби, а потоа ги споделува како „е-билтен“.

– Тргнав да направам „њузлетер“, водена од потребата на клиентите и од својата. Меѓутоа, на крај направив списание – објаснува Бурзевска.

Со цел да даде придонес и кон оштеството и да едуцира, Бурзевска се реши овој „е-билтен“ да го склопи во вид на списание и да ги прекрши стигмите и дезинформациите кои во ова бурно време ѝ тежат на психата на човекот.

„Идејава за списаниево, кое би било достапно и бесплатно за сите ми се виде можна, но сега-засега е само во дигитално издание, бидејќи, ете, не сме во можност да го издадеме во печатена форма.“

 

Првото издание на списанието како увид на тематики започна со креативноста, изненадувачки за Цветанка, бидејќи списанието имаше 60 страни. Таа веќе започна да го поготвува второто издание на списанието кое ќе опфати теми за самозапознавање како, „психилошка состојба“, „диагнозирање“ итн.

„Ме радува фактот што за неполна недела, можеби не е некој успех, меѓутоа, ми стигнаа мејлови во кои клиенти бараат да го преземат списанието“, вели Бурзевска.

Психолошкото списание на Цветанка е предвидено да излегува секој месец, достапно е на македонски и на англиски јазик.