Од 1 јануари ќе има нов ценовник за електричната енергија. Какви ќе бидат новите цени, претседателот на Регулаторната комисија за енергетика Марко Бислимоски вели дека ќе се знае во првата половина од декември. Во разговорот за емисијата „Слободен печат“, тој кажа и дека од Нова година не може да се очекува дополнителниот час на дневна евтина тарифа, ниту, пак, укинување на фиксниот надоместок од 200 денари за пристап до мрежа. ВМРО-ДПМНЕ претходно беше остар противник на оваа давачка, но како што вели Бислимоски, Владата ги прифатила аргументите зошто таа е воведена.

Во однос на цената на струјата, има дел што го регулира Регулаторната комисија за енергетика и за тој дел таа ќе даде отчет уште наредната недела, но крајниот износ ќе се донесе откако ќе завршат тендерите за купување струја за загуби, како и тендерот за купување струја за домаќинствата и малите фирми од државната ЕСМ.

За можноста дополнително да се воведе дневна тарифа, ќе се прават нови анализи во март-април.

– Во овој момент не може да се реализира тоа. Ние некаде во октомври ја презентиравме нашата анализа што се однесува за евтината тарифа. Анализиравме подолг период на часовно ниво и јасно видовме дека цената на електричната енергија во периодот од 12 до 16 часот е убедливо најниска, дека цената од 20 часот до 24 часот е некаде во просек за два до два и пол пати повисока од оваа цена. Увидовме дека постои простор во текот на денот, евтина тарифа да има не два, туку четири часа. Но, податоците не беа такви за вечерните часови. Имајќи предвид дека е веќе воспоставена навика кај нашите потрошувачи, решивме овој период од 22 до 24 да си остане понатаму период на евтината тарифа – рече Бислимоски.

Тој посочи дека ја имале предвид и ситуацијата во ЕСМ, каде што е потребна стабилизација на трошоците во самата компанија.

Бислимоски зборуваше и за сегашната цена на електричната енергија на берзите, но и за проблемите што може да се случат поради производството на струја од обновливи извори на енергија.

Целото ВИДЕО погледајте го во продолжение: