Од 13.400 учесници на 20. Скопски маратон, најголемо внимание привлече Бетмен. Христијан Проданов од Скопје е човекот кој се криеше зад маската на овој суперхерој, главната атракција на маратонот. Проданов трчаше 21 километар и задоволен е од тоа како поминал, не му била целта да брка рекорд туку да биде активен и да се забавува.

– Многу беше убаво, одлично поминавме, Бетмен беше интересен за публиката, не само за децата туку и за возрасните. Јас сум задоволен од тоа колку истрчав и покрај тоа што можеби за некого е слабо, но не ми беше целта рекорд – вели Проданов за „Слободен печат“.

Ова е негова петта маска по ред, сме го виделе „во улога“ на Спајдермен, Аквамен, Супермен, Капетан Америка.

– Мислам дека најдобро ми прилега Аквамен. Многу луѓе ми велат дека личам на актерот Џејсон Момоа и да, дефинитивно тоа ми е омилената маска – рече тој.

Маските кои ги носи Проданов не се купен производ, туку се оригинални изработки со долги часови работа на неговата мајка.

– Сите костими кои сум ги носел се дело на мојата вредна мајка. Таа ги изработува со многу труд за да ги направи перфектно, за што сакам и јавно да ѝ се заблагодарам. Навистина се оригинални и посебни. Морам да споделам дека мајка ми од дете ми правеше најубави маски за приредбите и за маскенбали на училиште и секогаш ја земов првата награда. Лани бев на белгардскиот маратон во костимот на Супермен и таму бев единстевн со маска – објаснува Проданов.

Некои од родителите ги мешаат суперхероите, ама децата не.

– На пример вчера на маратонот една мајка за да погоди кој сум ги нареди сите суперхерои додека да каже Бетмен, забавно беше – раскажува тој.

Христијан инспирирал неколку луѓе да се појават со маски, но сепак никој не ја достигнал неговата уникатност.

– Не ми пречи ако се појават и други маратонци коишто ќе бидат маскирани, напротив, баш би било интерсно да имам „конкуренција“ – рече тој.