Поминаа три години откако поранешното основно училиште „Партениј Зографски“ во скопската населба Пржино беше зафатено од огнените јазици, кога целата конструкција на објектот изгоре и остана во пепел, а на улицата „Кавалска“ сега е видлива само една руинирана барака, недопрена и непроменета од денот на опожарувањето.

Училиштето, своевремено служело за образување на ученици од прво до четврто одделение, сѐ додека не запрела едукацијата што овој простор го оставила само како една голема напуштена барака, а потоа било реставрирано и ставено во функција на шивалница.

Во април 2022 година оваа барака долга педесетина метри се запали и целосно изгоре. Тогаш, командирот на противпожарната бригада изјави дека пожарот бил локализиран и успешно запрен, а причината за него остана непозната.

Тоа е напуштена барака каде има три возила. Не е страшен пожар, но станува збор за голема, долга барака, педесетина метри која е празна – изјави командирот на противпожарната единица, Sвонко Томевски, на денот на пожарот.

Екипата на Слободен печат отиде на „Кавалска“, каде забележа насекаде расфрлано ѓубре, останати шивачки материјали од поранешната работилница, стакло, па дури и половина конструкција од автомобил. Случајните минувачи не беа нималку задоволни од тоа како Oпштина Кисела Вода се справила со овој проблем.

Секој ден поминувам одовде, живеам погоре и со години местово е оставено да скапува, општината најверојатно ја има заборавено оваа локација која сега изгледа како некоја обична руина- вели еден од минувачите.

Тој додаде дека на оваа локација луѓето со години фрлаат ѓубре и секаков вид на отпад, насобран во една енормна дива депонија.

Испративме прашања до Oпштината дали имаат изготвено план за реконструкција на ова училиште и повторно негово пуштање во употреба, можеби не како училиште од прво до четврто одделение, туку како училиште за целосно основно образование, или пак имаат други планови, како катна гаража или паркинг, а оттаму ни одговорија дека постои план за оваа локација.

Од Oпштина Кисела Вода велат дека овој простор не е заборавен и нѐ информираа  дека објектот ќе биде обновен, но на тоа место нема повторно да има училиште, туку ќе биде изграден објект кој ќе го користи една од институциите на Владата, но не одговорија зошто сѐ уште никој не го собрал сиот отпад од оваа локација.

Објектот на поранешното училиште за кое прашувате е општински објект и планираме реконструкција на истиот и ставање во функција за користење од страна на некоја од централните институции – велат од општината за „Слободен печат“.

Оттаму не конкретизираа кога ќе започне реконструкцијата или пак како ќе изгледа новиот објект, ниту пак до кога ќе биде завршен овој проект, оставајќи ја оваа разурната барака како грда глетка за околните жители и поминувачите.