Силна неподнослива миризба утринава ги разбуди жителите од полошкиот регион.Околу 1 часот по полноќ голем пожар избувнал на депонијата кај село Волковија, Општина Брвеница. Гореа илјадниците тони разновиден смет од каде се ширеше чад и миризба во тетовско-гостиварскиот регион.

Од Територијалната противпожарна единица Тетово, велат дека нивни екипи се 15 часа на лице место. Пожарот не може да се прошири на соседните ниви до депонијата, но потребни се повремени интервенции оти не е ставен под целосна контрола.

„Тоа што го разбравме од експертите кои се занимаваат со оваа работа, треба да се ископа некоја дупка и целиот отпад да се пренесе во дупката и истата да се покрие со земја. Ние се трудиме да го имаме пожарот под контрола, но чадот се шири низ полошкиот регион и создава многу проблеми. Се знае депониите кога се палат мора да се биде постојано тука оти може пак да избувне пожар под самиот смет. Помош ни треба, од државните институции што ги имаме да ни пратат експерти, да ни помогнат што побрзо да го изгасиме пожарот“, вели Авни Амети командир на ТПП-Тетово.

Се работи за депонија за која Владата има дадено дозвола за третирање на отпад во наредните 15 години. Се наоѓа во атарот на село Волковија на површина поголема од еден фудбалски стадион, цела опкружена со ниви.

Пожарот го снимавме и фотографиравме од еден полски пат на стотина метри од локацијата каде гореше оти концесионерот на депонијата не ни дозволуваше да се приближиме.

Видно револтиран и агресивен ни рече да заминеме од местото оти се работи за негов имот, но со интервенција на полицијата успеавме да го регистрираме пожарот.

Сопственикот во расправијата со медиумите кажа дека некој намерно му ја запалил депонијата. Најпрвин како што рече некои бараки биле запалени каде имало поставено камери за да не се остават трага и потоа и купиштата смет и тоа ноќеска еден час по полноќ, што остава простор дека пожарот е подметнат.

Од Општина Брвеница, велат дека за третирање на отпадот на самата депонија сопственикот има легална дозвола издадена од Министерство за животна средина.

„Од страна на кризниот штаб на Општина Брвеница и Инспекторот за животна средина, веднаш е пристапено на терен, констатирана е состојбата, изработан е записник. Ќе се постапи согласно тоа што е констатирано од страна на инспекторот. Како последна информација што ја имаме од теренот од страна на нашите надлежни вработени е дека огнот е изгаснат, но се уште се шири чад. Во рамки на надлежностите на Општина Брвеница, имаме Инспектор за животна средина, имаме комунален инспектор. Превентивно пред почеток на летото делувавме кај сите правни субјекти за правилно третирање на отпадот. Доколку има неправилности во овој немил настан од страна на нашиот инспекторат ќе биде изготвен записник и согласно констатирана состојба ќе бидат преземени сите законски мерки“, рече Горан Јовановски секретар на Општина Брвеница.

Тетовските пожарникари денеска интервенираа и во село Челопек каде исто така гореше депонија.