Честа пракса кај гостите во угостителските објекти е да се остави бакшиш при плаќањето на сметка. Тоа е најчесто одредена сума, симболична, која е наменета за келнерите и варира во зависност од желбата на гостинот и колку тој е задоволен од услугата и начинот на подготовка на храната или пијалаците.

„Слободен печат“ ги праша граѓаните дали оставаат бакшиш кога одат во кафеaна и колку сметаат дека треба да се остави?

Мнозинство од анкетираните беа согласни околу идејата да се остави 10 отсто од сумата на сметката како бакшиш. Дел од нив кажаа дека може да се остави и повеќе, во зависност од тоа колку се задоволни од храната и услугата.

– Мислам дека бакшиш треба да се остави. Мислам дека треба да се остави минимум десет отсто од вредноста на сметката, бидејќи ако е помалку може да биде и навредливо – рече еден од анкетираните граѓани.

Анкетираните граѓани, сметаа дека келнерот и начинот на неговата комуникација, како и пристапот се навистина важни и влијаат на големината на бакшишот.

– Сакам келнерот што ме услужува да биде нормален и љубезен. Сѐ зависи од услугата и моментот, може да оставиме и по 100, 200, 500 денари, понекогаш и 1000 денари – рече една помлада госпоѓа.