Меѓународниот ден на жената или 8 Март е денот кога се одбележува борбата на жените за економска, политичка и социјална рамноправност со мажите. На овој ден се даруваат жените со најразлични подароци, но доминираат цвеќињата. „Слободен печат“ ги праша граѓаните какви подароци најчесто купуваат за 8 Март и на кого.

Една од анкетираните изјави дека подароци најчесто купува за нејзината мајка и за тетка ѝ.

– На мајка ми ѝ купив сѐ она што ѝ треба за секојдневниот живот, како омекнувач, чупалка, фарба за коса и слично – рече таа.

На прашањето за кого најчесто купува подарок, еден од граѓаните одговори:

– Купувам цвеќиња за припадничките на понежниот пол, што ми се поблиски. Без разлика дали станува збор за членови на семејството, за колешки, пријателки и така натаму – изјави тој.

Како актуелна тема која се отвора со доаѓањето на овој празник е и купувањето подарок за наставничките и учителките што често претставува голем трошок за родителите.

Една од анкетираните изјави дека покрај тоа што купува подароци на нејзината мајка, баба, снаа, купува и подароци за учителките во градинка. Доследно на тоа, ја прашавме колку пари би било соодветно да одвојат родителите за да се купи подарок за учителките.

-Не можам да го одговорам тоа, затоа што тоа е релевантно, сите имаат различно мислење. Каков и да е подарокот и која и да е цената, сепак е подарок и е одвоено и од срце е купено. Така што мислам дека цената не треба да игра главна улога во тоа – рече таа.