Покрај околностите, економската криза и големиот број млади кои се отселуваат од Македонија, „Слободен печат“ спроведе анкета со две прашања, кои ги поттикнаа граѓаните подобро да размислат.

Прашањата беа, Дали верувате дека Македонија ќе влезе во Европската Унија и доколку влезе, дали би останале тука?

Одговорите на анкетираните граѓани беа различни.

-Би било убаво. Да прошеташ, да заработиш некој денар – рече еден печалбар кој со сопругата веќе неколку години се иселил од Македонија во потрага по подобри услови за неговото семејство.

Други велат дека не се надеваат премногу.

-Не сум сигурна, со оглед на сè што се случува – рече една постара жена која додаде дека нејзините години не ѝ дозволуваат таква промена.

Има и такви кои не веруваат ни во самата Европска Унија.

-Се распаѓа. Не верувам повеќе во тоа – вели еден постар господин.

Македонка која живее во Германија изјави:

-Добра е Македонија, ама нема услови за младите. Шест години сум надвор, владата ни е катастрофа.

На прашањето дали младите ќе останат во Македонија, ако Македонија стане членка на ЕУ, одговорите беа реални и искрени.

-Подобро е „горе“, рече печалбар кој ни објасни дека финансиските услови му олеснуваат да живее покомфорен живот.

Еден помлад дечко изјави дека секако би се отселил доколку има позитивни промени во државата.