Зоран Ристевски познат по прекарот Зоки Бејбе, е лик кој не може да остане незабежлив. Во секое ќоше на градот, од авангардa па до андерграунд… Градска икона, диџеј и радиоводител.

„Тоа е тоа, јас сум БЕЈБЕ“, вели тој во интервјуто за „Утрински печат“.

Со него разговаравме за неговите доживувања на „раната“ сцена и за публиката, промените и околностите во нашето општество, новите генерации, музиката, радиото итн…

„Бејбе“ – со лична заменка „Бебо“, но, не и единствена. Меѓу другото, Зоки бил и диџеј Фрики, Зоки Поплава итн., а за настанувањето на неговиот прекар – „Бејбе“ за „Утрински печат“ ја раскажува случката кога тој и негов пријател ги испраќале нивните девојки на автобуска станица. Во еден момент, пријателот извикал „Чао Бејбе!“, термин настанат од популарна музика. Работејќи на разни места со многу вработени, бидејќи не можел да им ги запамети имињата на сите, почнал да им се обраќа со „Бејбе“…

„Ова диџеј Фрики, ништо не ти значи. Ти си Зоки Бејбе, сите те знаат така“, му рекла во една прилика неговата пријателка Јулија и го дала последниот печат на неговиот прекар.

Инаку, неговата редовна веќе позната радио-емисија „Првата убава работа во денот“ на брановите на Радио Бар заедно со диџејот и продуцент и негов добар пријател Зија Вишко произлегла во екот на пандемијата кога тој останал без работа. Да, пријателите се познаваат по тешките времиња…

Дождливиот ден при снимањето на интервјуто за „Утрински печат“ го потсети Бејбе на добрите денови и журки во Амстердам, при што се присети на гостувањето на диџеј Димитри (хаус диџеј од Амстердам, во 1998 во МКЦ, Скопје), кој тогаш бил еден од петте светски познати диџеи и домаќин на најголемиот „крем“ на техно музиката во тој период. Незаборавната скопска журка организирана од диџеј Никола Ризов, диџеј Самоил Радински и неговата најдобра другарка и диџеј Јулија Бојкова Божиновска, била една од првите култни скопски журки кои го поттикнале Бејбе да пушта музика, но и фактот дека бил фасциниран и „просветлен“ од гостувањето на диџеј Димитри.

Првото одење во Амстердам било тригер за неговото професионално формирање во музичката диџеј сфера. Со самото пристигнување во Амстердам, Зоки Бејбе отишол во познатиот клуб „Рокси“ каде, се подразбира, резидент диџеј бил Димитри. Под големи импресии од првата посета, Бејбе дури снимал и радио репортажи, диџеј миксови кои траеле 7 дена, кои се емитувалe на тогашното А1 радио, на крајот на деведесеттите години. На покана од други диџеи и пријатели, Зоки Бејбе успеал да покрие многу настани во Амстердам кои потоа следеле со диџеј гостувања во други држави, па неговиот сон полека станувал реалност.

„Пуштав музика на места коишто сонував дека ќе ми се случат“, вели Зоки Бејбе.

Неговите почетоци на радиоемитување започнале во периодот на неговото студирање кое подоцна го ставил на пауза за да се посвети на музичката кариера. Неочекувано, станал прв уредник на првото приватно радио во Македонија, што според Бејбе била бизарна случка бидејќи оваа професија не била потполно прифатена од страна на татко му. Тој потоа се приклучил на првата постава на Радио 103 каде ја водел емисијата „Фронт 103 на Канал 103“.

„Јас сум некој којшто буквално шета и меѓу шминкерските и меѓу авангардните места во Скопје, таков беше и мојот музички избор…“, вели Зоки Бејбе.

Тој за „македонската публика“ со гордост вели дека имаме најдобра сценска публика. Но, како секаде во светот, по пандемијата и сите општествени проблеми, и генерациите се менуваат… не е исто тоа што било порано. Но, има нова енергија. Младите имаат потреба за „рејв“, затоа „рејвот“ е пак во мода, вели Зоки Бејбе.

„Рејвот е одреден начин на револт, кон се она што им се случи на младите. Замислете вие да имате 17 години во 2019 година. Почнува пандемија и следните три години не можете да мрднете…?!“

Тој истовремено е резидент диџеј во клубот „Станица 26“ каде што пушта музика на младите генерации за кои вели дека нивното доживување на музиката од деведесеттите години која сега се враќа во мода е фасцинантна.

30 години багаж не е малку, нели?

Целото интервју со Зоки Бејбе можете да го проследите на следниот линк: