Српскиот претседател Александар Вучиќ вчера беше во посета на жителите на регионите кои деновиве се погодени од големи шумски пожари, а од неговата посета највпечатлив беше „телефонскиот разговор“ пред камерите на Вучиќ со министерот за земјоделие Драган Гламочиќ.

Веднаш откако беше објавена снимката, корисниците на социјалните мрежи во Србија забележаа дека таа е чудна и многу наликува како српскиот претседател да го одглуми разговорот, односно како тој да зборуваше сам со себе, во обид да се прикаже како проактивен и ефикасен во решавањето на проблемите на граѓаните.

„Ало, Гламочиќ… па, се прекинува врската затоа што не сум во центарот на Белград, туку некаде на друго место, Гламочиќу… Ајде сега, земи и гледај како на луѓето кои се погодени од пожарите, каде им изгоре стоката, да им се помогне…“, вели Вучиќ во „разговорот“ со пропагандна форма и сомнителна кредибилност.

Вучиќ и претходно знаел да им се јавува на владини министри и функционери пред камерите, но во претходните случаи тој го пушташе разговорот на звучникот на телефонот, па автентичноста не беше спорна. Последнава снимка наиде на лавина од главно негативни, но и потсмешливи коментари на интернет.