Возачи во Полска денеска ги блокираа бензинските пумпи во знак на протест поради поскапувањето на горивата.

На снимките се гледаат десетици автомобили и мотоцикли кои точеа минимално количество гориво и со одложување на плаќањето на сметките и намерно доцнење, како и со симулирање дефекти на автомобилите, предизвикаа големи гужви, јавуваат полските медиуми.

Блокадите беа организирани преку социјалните мрежи, во различни региони на Полска.

Како и во цела Европа, во последните месеци и во Полска растат цените на горивата. Во мај, малопродажните цени биле за 35,4 отсто повисоки од лани и за пет отсто повисоко од април.

Во Полска, сегашната просечна цена за литар безоловен бензин од 95 октани е околу 1,86 долари. За споредба, цената на овој бензин кај нас во моментов изнесува 110 денари, што е малку поскапо отколку во Полска (1,88 долари).