Оганот кој проголта две стари, но функционални куќи во село Бељаковце, две помошни простории и една стара напуштена куќа во селото Руѓинце претставуваше опасност за други куќи и населението од овие две села, вели директорот на Центарот за управување со кризи, Стојанче Ангелов. Тој на неговиот Фејсбук профил соопшти дека иако се избегнува ноќно гаснење на пожарите на отворено тие синоќа одлучиле да се справат со пожарот кој се движеше во два правца со линија подолга од еден километар.

Чекањето на раните утрински часови кога можеа да полетаат двата полициски и еден армиски хеликоптер, ќе предизвикаше дополнителен ризик за куќите и населението во овие две села – вели Ангелов.

На местото на пожарот веќе биле присутни пожарникарите од ТППЕ Старо Нагоричане, Ранковце и Крива Паланка, а директорот на ЦУК побарал засилување со пожарникари од ТППЕ Кавадарци, Штип, Свети Николе и Куманово, вклучително и пожарникари од доброволното противпожарно друштво од Свети Николе но и од локални жители.

Поддршката ја барав возејќи кон пожарот. Беше темно кога пристигнав во с. Бељаковце и веднаш извршив извидување на теренот и состојбата со пожарот. Отидов до две опожарени помошни простории. Од таа позиција имав добар видик на едниот крак од пожарот. Пред полноќ пристигна и комплетното засилување со пожарникари од посочените ТППЕ. Околу 00:30 часот одлучивме да се приближиме на пламените јазици кои на некои места се издигнуваа по неколку метри над земјата голтајќи ги пред себе дрвјата, грмушките и високата сува трева. Опремени со т.н. напртњачи (машини со рачни прскалки со 20 литри вода кои се носат на грб) како и специјални противпожарни метли со метални ленти, исклучително храбрите и пожртвувани пожарникари, со теренски возила ги пренесовме пред самата линија на огнот. На местото на кое го пресретнавме пожарот, огнот гореше многу силно, температурата беше висока и имаше многу чад – пишува Ангелов на Фејсбук.

По двочасовна борба со огнот, тој додава дека целосно го изгаснале пожарот, а дежурна екипа на пожарникари од ТППЕ Кавадарци и Штип останала на терен да ја следи состојбата.

Во овој момент, вторник наутро, пожарот не покажува никакви знаци на горење. Изгорената површина најверојатно е значително поголема од 100 хектари, дополнително ќе излеземе со поконкретна процена – вели Ангелов.