Швеѓанката Сесилија Бломдал живее во градот Лонгјербјен на островот Свалбард, кој се наоѓа во близина на Северниот пол.

На Тик-ток со своите 2,3 милиони следбеници таа често споделува видеа од своето секојдневие и им објаснува што го прави Свалбард толку посебен. Сесилија признава дека речиси секој ден добива прашања зошто живее таму.

„Еве зошто. Природа. Ако живеете на место како Свалбард, место кое се наоѓа во близина на Северниот пол, мора многу да ја цените природата. Во спротивно, ќе ви биде многу тешко. Нам не нѝ е тешко да седнеме на моторни санки и да возиме 90 километри во еден правец за да одиме на ручек. Таков е животот овде“, раскажала Сесилија во едно од видеата. Таа вели дека ниските температури не ѝ пречат, а дожд во Свалбард не врне често.

Уште една интересна работа во врска со Свалбард се поларните денови и поларните ноќи – тоа значи дека во текот на летото, 24 часа е ден, а во текот на зимата е ноќ. Сесилија во своите видеа покажува како е да се живее во такви услови. Се чини дека нејзе ниту темнината во 11 часот наутро не ја спречува во ништо. Таа и нејзиното момче редовно го шетаат кучето. Притоа секогаш носат многу слоеви облека, бидејќи во лето температурите во Свалбард не надминуваат 7 степени Целзиусови, а во зима се спуштаат и до минус 13.

Чести се и снежните бури, но луѓето на Свалбард сосема нормално одат на работа. Сесилија вели дека таа и нејзиното момче патуваат со автомобил, само мора да возат многу побавно.

Кога оди на планинарење, Сесилија никогаш не ја напушта својата колиба без пушка поради поларните мечки кои ги има во изобилство. Но, како што вели таа, никогаш не се сретнала со ниту една мечка.

@sejsejlija What do I actually do for work? ?✨️? #cabinlife #longyearbyen #dayinmylife #svalbard ♬ Metamorphosis – Danilo Stankovic

Лонгјербјен, градот во кој живее Сесилија, е најсеверниот град на Земјата. Се наоѓа на Шпицберген, најголемиот остров на архипелагот Свалбард. Нема автохтоно население – секој што живее во Лонгјербјен се доселил од некаде. Имаат само една продавница, неколку хотели и две кафулиња.

Сесилија на својот профил открива многу интересни факти за ова место. На пример, за Свалбард не ви треба виза или работна дозвола. Но, постојат и некои навистина чудни правила, а едно од нив е дека не е дозволено да се породите на Свалбард. Ако жената е бремена, еден месец пред породувањето мора да оди на копно и таму да се породи. Но, најважното правило е дека не смеете да останете без пари. Свалбард дозволува секој да живее и работи на него, но само ако може да се грижи за себе и да има каде да живее. Во спротивно, им се заканува протерување од островот.

Таму нема јавен превоз, пензионерски дом ниту прифатилиште за бездомници.

Освен што ја носи титулата најсеверниот населен град во светот, норвешкиот град Лонгјербјен, сместен на архипелагот Свалбард, е малку необичен и поради една друга работа. Имено, во него никој не умрел повеќе од 70 години затоа што умирањето е забрането со закон.

Како што пишува „ИФЛ саенс“ (IFL Science), дури и луѓето што цел живот живеат овде, доколку случајно заболат од неизлечлива болест, мора да го напуштат островот и „да ја сретнат својата смрт“ на друго место. Доколку, пак, некој ненадејно почине во Свалбард, неговото тело ќе биде однесено и нема да биде погребано на островот.