Во Обединетите Арапски Емирати денеска беше потпишан инвестицискиот договор за подводно поврзување на енергетската дистрибутивна мрежа со Италија во Јадранското Море, како и за инвестиции во зголемување на производството од обновливи извори во Албанија, меѓу Владата на Република Албанија, Владата на Република Италија и Владата на Обединетите Арапски Емирати.

Договорот, кој за албанската страна го потпиша вицепремиерката и министерка за инфраструктура и енергетика Белинда Балуку, ги обединува земјите во стратешки сојуз за обновливи извори на енергија.

Претходно, за време на својот говор на Самитот, премиерот Еди Рама рече дека договорот ќе послужи за зголемување на капацитетот на Албанија како клучен играч во регионот, врз основа на нејзиното производство со 100% обновлива енергија.

На церемонијата на потпишување присуствуваа албанскиот премиер Еди Рама, премиерката на Италија Џорџа Мелони, претседателот на Обединетите Арапски Емирати шеикот Мохамед бин Зајед, како и претставници на владите на соодветните земји.

Италија и Албанија ќе потпишат договор за подводна енергетска интерконекција