Во интервју посветено на Рафаел Надал, Карлос Моја, неговиот тренер од 2018 до 2024 година, даде една од причините зошто шампионот од Мајорка е многу почитуван од сите.

– Во неговите 1.307 професионални меча, Рафа никогаш не скршил ниеден рекет. Секогаш ги почитуваше своите противници. Ако загубеше тоа го сметаше за сопствена одговорност. Тој беше првиот што ќе му даде комплимент на противникот. Тој беше врвен борец: жилав, интензивен, енергичен во секој меч. Со сите се однесуваше исто, од волонтер до директор на турнирот. Беше пример, на теренот и надвор од него. Инспирација за сите – изјави Моја.

Рафа Надал неодамна се повлече од активното играње тенис. Тој речиси две децении беше водечка фигура во светскиот тенис. Освои 22 грен-слем титули, само Новак Ѓоковиќ има повеќе (24).

Некои тенисери се познати по тоа што знаат да го искршат рекетот за време на некој меч, ако се изнервираат. Најпознати „уништувачи“ на рекети се Стен Вавринка, Ник Кирјос, Григор Димитров, Карлос Алкараз, Новак Ѓоковиќ… Дури и ладнокрвниот Роџер Федерер знаеше да го искрши рекетот (пет пати во кариерата).

На видеото е Ник Кирјос како во една прилика искрши два рекета едноподруго. Австралиецот, кој по подолга пауза наскоро треба да направи камбек, во едно интервју изјави дека искршил повеќе од 1.000 рекети, што веројатно е нереално голема бројка.

Nick Kyrgios knows he missed a real opportunity to win his first Grand Slam singles title ??#USOpen | @NickKyrgios pic.twitter.com/KWzTV1Gocf

— Eurosport (@eurosport) September 7, 2022