Македонскиот гитарски виртуоз и продуцент Дамир Пух ја сподели радосната вест дека го освоил првото место на престижен меѓународен натпревар за музичка продукција, организиран од легендарниот американски продуцент Ерик Валентајн – човекот зад албумите на „Квинс оф д стоун ејџ“, „Марун фајв“, „Гуд Шарлот“, „Трд ај блајнд“, „Смеш маут“ и многу други.

Во конкуренција од над 230 учесници од целиот свет, меѓу кои имало реномирани професионалци, добитници на Греми и номинирани инженери и продуценти, токму миксот на Пух бил избран како победнички.

„Ова признание е уште повредно и посилна потврда за мојата работа. Јасен показател дека мојот труд и визија се препознаени на највисоко ниво и само почеток на уште поголеми успеси што следуваат“, напиша Пух на својот фејсбук-профил, каде што објави и видео во кое Валентајн ги соопштува резултатите, како и негово обраќање во врска со целиот процес.

Да потсетиме, Дамир Пух е музички продуцент, автор на песни, гитарист и микс инженер. Тој работи со музички групи и уметници од поп и рок-жанрот, а зад себе има неколку национални радиски хитови. Како соло артист и соработник, секогаш ја спојува уметноста со техничката вештина.

Во неговото портфолио се издвојуваат соработки со Дерек Шеринијан, настапи како поддршка на „Дип Перпл“, како и работа на различни музички и комерцијални проекти за светски брендови.

Тој е основач и сопственик на „Грин рум саунд студио“, каде што помага на уметници да го оформат својот звук, а паралелно ја гради и својата солистичка кариера.

Неговата сопруга Наташа Миха е, исто така, музичарка.