Успешно е евакуиран повредениот планинар, кој утрово скрши нога качувајќи се на планината Пелистер.

Во акцијата заедно учествуваа Дирекцијата за заштита и спасување и МВР. Полициски хеликоптер кој бил упатен кон едно од местата каде има пожари во државата, беше пренасочен на местото каде што се наоѓаше повредениот планинар, информираше директорот на ДЗС, Стојанче Ангелов.

„Тим за спасување од планина на ДЗС беше упатен кон позицијата кадешто се наоѓаше повредениот планинар. Истиот беше имобилизиран и пренесен на место кадешто хеликоптерот можеше да слета. Од страна тимот за спасување теренот беше расчистен од дрвја и грмушки за да хеликоптерот може да слета, по што истиот беше качен на хеликоптер и сега е пренесен до блиската болница“ изјави Ангелов.

Акцијата беше спроведена на исклучително тежок и непристапен терен во близина на Пелистер, а во неа учествуваа тројца припадници на Одделот за воздухопловни единици и четворица припадници на специјалната антитерористичка единица „Тигар“, информираше министерот за внатрешни работи, Панче Тошковски.

„Со оваа акција нашите припадници уште еднаш докажаа дека македонската полиција секогаш е таму каде што е најпотребна, особено кога се спасува живот и се делува под најтешки услови“ напиша Тошковски на Фејсбук.

Спасувачка акција на Пелистер: планинар скршил нога и чека извлекување