Украинскиот центар за специјални операции „Алфа“ објави снимка на која тврди дека се гледа ефектно уништување на руски тенк „Т-80“ од страна на украинските специјалци.

На снимката, на музичка подлога од американски рап, се гледа како тенкот се обидува да се извлече по селски пат, но тој е двапати погоден од проектили, по што екипажот излегува, а војниците бегаат трчајќи по патот.

„Непријателот им задаваше многу проблеми на нашите позиции, користејќи ја тактиката на брзи тенковски напади. Но, тоа не траеше долго бидејќи еден од тенковите е разоткриен и уништен од борците на Центарот за специјални операции“, е наведено во соопштението на Безбедносната служба на Украина.

Тенкот „Т-80“ се произведува од 1976 година, а досега се произведени над 5.000 возила.

Според податоците на специјализираниот сајт „Oryx“, кој тврди дека ги следи и потврдува уништените парчиња воена опрема во Украина, досега се уништени над 340 различни варијанти на тенкови „Т-80“ на руските сили.

Украинците тврдат дека досега вкупно уништиле преку 1.500 руски тенкови на бојното поле.