Во Општина Илинден вечерва ќе се одржи традиционалниот поетски митинг „Стихови на душата“ во рамки на традиционалните Денови на културата. За таа цел вратите на Домот на култура „Илинден“ се отворени за посетители кои ќе сакаат да ги слушнат стиховите на голем број реномирани домашни поети.

– Централен настан на манифестацијата што се реализира во соработка со Друштвото на писателите на Македонија е поетскиот митинг што ќе се одржи вечерва со почеток во 19.00 часот, на кој ќе настапат повеќемина реномирани македонски поети. Деновите на култура се збогатени и со изложбата на Драган Кузмановски, настап на културно-уметнички друштва, како и музички групи, рече градоначалникот на Илинден, Александар Георгиевски.

Во рамките на манифестацијата се одржа и традиционалното Литературно матине за деца со учество на повеќемина истакнати македонски писатели за деца и млади на кое беа доделени награди и пофалници за најуспешните творби на учениците, пристигнати на литературниот конкурс распишан по повод Литературната манифестација.