Тешка сообраќајна несреќа се случила попладнево на патот меѓу скопските села Рашче и Сарај, кога автомобил паднал во реката Вардар, јавува „Алсат“.

Телевизијата, повикувајќи се на полициски извори, објави дека во автомобилот се наоѓале петмина членови на семејството Арслани од селото Грчец. Станува збор за брачна двојка која патувала со едниот син и снаата од другиот син. Петтиот патник, според овие информации, било четиригодишно дете кое излетало од автомобилот пред тој да падне во реката. Детето го пронашле минувачи, кои повикале брза помош и тоа било однесено во болница. Засега нема информации за неговата здравствена состојба.

На местото на несреќата се пристигнати полиција и нуркачи, кои учествуваат во потрагата по четворицата луѓе, од кои во моментов нема трага, објави „Алсат“.

Во СВР Скопје попладнето во 16 часот е пријавено дека на локалниот пат за селото Рашче, патничко возило излетало од патот и паднало во реката Вардар. На местото на настанот веднаш се упатени полициски службеници и Итна медицинска помош, а екипа на САЕ Тигар презема мерки за вадење на автомобилот.

„Во 18 часот од ГОБ „Св. Наум Охридски” сме известени дека кај нив од страна на случајни минувачи е донесено четиригодишно дете, кое потоа е пренесено во Клиничкиот центар“, велат од полицијата.