Норвежанецот Халвор Егнер Гранеруд победи вечерва во Оберстдорф во натпреварот во скијачки скокови што се одржа во рамките на новогодишната турнеја „Четири скокалници“.

Првата победа на Новогодишната турнеја Гранеруд ја оствари со скокови од 142,5 и 139 метри, со 312,4 освоени поени.

Второто место го освои Полјакот Пјотр Жил, кој освои 299 поени, со скокови од 132,5 и 137 метри, а на подиумот се искачи неговиот сонародник Давид Кубацки со скокови од 140,5 и 136 метри, односно со 294,9 поени.

Минатосезонскиот победник на новогодишната турнеја, Јапонецот Риоју Кобајаши, се најде дури на 15 место (256,6 поени).

Поради проблеми со силен ветер, натпреварот беше прекинуван неколку пати. Новогодишната турнеја, 71 по ред, ќе продолжи в недела на 1 јануари со скоковите во Гармиш-Партенкирхен.