Неименуван маж од Џорџија, Америка паднал во напуштен бунар длабок 15 метри додека го барал својот мобилен телефон. Неговото загрижено семејство повикало полиција, бидејќи тој не се вратил дома, а потоа биле откриени деталите од бизарниот инцидент, пишува „Дејли мејл“.

Сè започнало во четвртокот, околу 22 часот, кога човекот тргнал во шумата, во областа Коб. Тој со мобилниот телефон на сопругата го следел сигналот на својот мобилен телефон за да го пронајде, а потоа паднал во бунарот.

Околу 4 часот наутро семејството повикало полиција која организирала спасувачка акција. Во еден момент го слушнале лелекот на несреќниот човек и сфатиле каде се наоѓа.

„Прво го лоциравме неговиот автомобил, а потоа го најдовме бунарот. Кога се движите ноќе без добра батериска ламба, лесно можете да западнете во неволја“, изјавиле надлежните.

Пожарникарите објавија и видео од извлекувањето, а целата операција траела осум часа. Несреќниот човек бил свесен откако со јаже бил извлечен од длабоката дупка.

Тој бил пренесен во болница, а лекарите очекуваат брзо закрепнување. Но, како што велат било чудо што успеал да го преживее падот од толку голема височина.