Во битката на поранешните европски шампиони, Франција излезе како победник, совладувајќи ја Словенија со 103-95. Иако резултатот ја одразуваше супериорноста на „триколорите“, вниманието и овојпат беше насочено кон Лука Дончиќ, кој беше на чекор до нов трипл-дабл настап.

Ѕвездата на Далас ја водеше Словенија со 39 поени, 9 асистенции и 8 скока, но на спротивната страна блесна и Силвен Франсиско, кој со 32 поени беше клучниот играч во француската офанзива.

Сепак, крајот на натпреварот мина во знакот на контроверзниот потег на Франсиско. Откако резултатот веќе беше решен и двете селекции започнаа да се поздравуваат, ФрансискО,  иако претходно му подаде рака на Дончиќ, неочекувано тргна сам кон кошот и реализираше лесни поени. Потег кој не е во духот на фер-плејот и кој предизвика негодување кај словенечките играчи.

Вообичаено во вакви ситуации, топката се остава и натпреварот завршува со спортски поздрав. Франсиско одлучи поинаку – и остана енигма дали стануваше збор за провокација или недоразбирање.