Полицијата ги идентификувала лицата кои вчера го оставија сомнителниот куфер пред седиштето на ВМРО-ДПМНЕ, на плоштадот „ВМРО“.

Според информациите, се работи за швајцарскиот државјанин Рафаел С. (1987) и женско лице со идентитет Вивиан С.Х. (1985), кои во Македонија пристигнале на 1 октомври со лет од Цирих.

Се појави и видеоснимка од надзорните камери, на кое се гледаат странците како го оставаат куферот и заминуваат.

Според видеонадзорот, како што велат од МВР, двете лица го разгледувале просторот, по што едното оставило куфер пред објектот. Не се јасни мотивите за ваквата постапка.

За вчерашната евакуација на околните згради, беше кажано дека се работи за дојава за бомба. Од МВР потврдија дека по извршената проверка утврдено е дека се работи за празен куфер и не претставува закана по безбедноста.

Случајот го пријавил вработен во обезбедувањето на Јавното претпријатие „Државни патишта“, кој рекол дека забележал две лица кои го разгледуваат просторот, при што едно од нив оставило куфер.

Сомнителен куфер оставен до седиштето на ВМРО-ДПМНЕ, се евакуираат околните згради