Ѕвездата на Милвоки бакс, Дејмијан Лилард (34), доживеа сериозна повреда во првата четвртина од натпреварот против Индијана пејсерс, во рамки на првата рунда од НБА плејофот. Лилард падна на паркетот без контакт со противник, а веднаш потоа побара медицинска помош и не беше во можност самостојно да го напушти теренот.

Американските медиуми пренесуваат дека постои сомнеж за повреда на Ахиловата тетива, што би можело сериозно да го загрози не само продолжението на неговата сезона, туку и целата кариера.

damian lillard injurypic.twitter.com/rGkMJ7t428

— ◇ (@H00DH3R0) April 28, 2025

Лилард неодамна се врати на паркетот по едномесечна пауза поради дијагностицирана длабока венска тромбоза во десната потколеница, поради што мораше да прима лекови за разредување на крвта. Иако првичните прогнози велеа дека нема да игра до крајот на сезоната, успеа да се врати токму за втората пресметка со Пејсерс.

Во актуелната сезона, Лилард одигра 58 натпревари за Бакс, со просек од 24,9 поени, 7,1 асистенција и 4,7 скока по меч.

Кариерата во НБА, Лилард ја започна во 2012 година како играч на Портланд трејлблејзерс, каде што веднаш блесна и беше прогласен за најдобар дебитант со просек од 19,0 поени и 6,5 асистенции во првата сезона.

Деветкратниот учесник на Ол-стар натпреварот, а воедно и МВП на Ол-стар спектаклот минатата година го освои единствениот тимски трофеј минатата сезона, кога со Бакс беа победници на првото издание на НБА Купот.