При археолошките ископувања во Јешилова Хојук во турската провинција Измир, пронајден е камен ајлајнер (моливче за очи) стар 8.200 години. Раководителот на ископувањето Зафер Дерин од Универзитетот Еге изјави дека предметот е долг 9,5 см и го претставува најстарото моливче за очи некогаш пронајдено, пишува „Аркеоњус“.

„На врвот има остатоци од црна боја. Тоа е украсен предмет и покажува дека пред 8.200 години и Егејките се грижеле за својот изглед, ја сакале убавината и се грижеле за себе“, рекол тој.

Тој објасни дека изострен камен молив бил ставен во сад со боја и дека и денес овој метод го користат жените во различни делови на Анадолија.

Се верува дека црната супстанција на врвот на наодите испратени на анализа е манган оксид. Овој минерал во прав бил главната компонента на козметиката која се користела како молив за очи во античко време.

Ископувањата на тумбата во Јешилова траат од 2005 година, а наодите се значајни бидејќи сугерираат дека населбите во областа датираат од 8.500 до 6.500 години пред нашата ера. На тој локалитет веќе се откриени важни индиции за раните доселеници во областа на Измир на брегот на Егејското Море, нивната околина и нивната култура.

На пример, тие живееле во посебни куќи, со посебни покривни системи, за разлика од Чаталхојук во централна Анадолија, каде што куќите се една до друга.