Се урна покрив во трговски центар во Перу, при што загинаа три лица, а повеќе од 70 се повредени.

„Досега имаме три жртви, двајца мажи и една жена“, изјави за ТВ Америка командантот на противпожарната служба Гелки Гомез.

Бројот на повредени се искачи на 74, изјави здравствениот претставник на локалната власт Анибал Мориљо, откако Министерството за здравство претходно објави 20 повредени.

Десетици семејства биле во ресторанот на трговскиот центар кога се урнал покривот, јавуваат локалните медиуми.

Уривањето се случи во трговскиот комплекс „Реал Плаза“ во Трухиљо, третиот по големина град во земјата, кој се наоѓа на околу 500 километри северно од главниот град Лима. Потрагата по преживеани е во тек, а повеќе од стотина пожарникари и полицајци ги пребаруваат урнатините.

„Детето беше заробено под металните конструкции на покривот“, изјави Морило за ТВ Панамерикана.

Министерот за внатрешни работи Хуан Хозе Сантиванес процени дека површината на урнатиот покрив е од 700 до 800 квадратни метри.