Фудбалерите на Реал Мадрид брзо го заборавија поразо од Валенсија во Примера и вечерва славеа против Рајо Ваљекано на Столе Димитриевски со 2:1

По настаните во минатото коло и расистичките навреди кон него, Винисиус Жуниор не беше во составот. Во негово отсуство одговорноста ја преземаа Бензема и Родриго.

Резултатот беше отворен по половина час игра кога Бензема го искористи додавањето од Валверде. За нови возбудувања се чекаше се до финишот од натпреварот кога Де Томас израмни во 84-тата минута, а Родриго го совлада Столе Димитриевски во 88-та минута и донесе победа за „кралевите“.

Во преостанатиот натпревар Виљареал беше сигурен и со 2:0 го совлада Кадиз. Херој на „жолтата подморница“ беше Џексон кој ги постигна двата гола. Виљареал на две кола пред крајот заостанува пет бода зад четвртопласираниот Реал Сосиедад.