Олимписките игри беа затворени во неделата, но олимписката приказна се’ уште не е завршена. Следува Параолимпијадата и со нејзиното затворање се заокружува олимпискиот процес, изјави за Утрински брифинг новинарот Благоја Георгиевски.

-Игрите во спортска смисла ќе бидат запаметени по учеството на 91 земја, 2871 спортист учествуваа. Беа поделени рекордни 109 сета медали. Норвешка има рекорд и е прва во листата на медалисти и освои 16 златни медали што е рекорд до сега, вели новинарот Георгиевски од „Слободен печат“.

Случајот од Зимската олимпијада за кој долго ќе се зборуваше беше оној на руската лизгачка Камила Валиева.

-Камила Валиева е една трагична фигура. Нејзиниот прв настап во екипниот дел беше оценет како нешто досега невидено. Таа направи три-четирикратни свртувања во воздух. На едното падна, но беше оценето како нешто невидено. Коментарите во цел свет беа неподелени – дека иако е 15 -годишна, се работи за најголемата лизгачка на сите времиња.  Еден ден потоа дојде оној извештај за анти-допинг тестирањата од швајцарската лабораторија, каде што примероците биле земени во декември. Нема објаснување од швајцарската лабораторија зошто толку долго се чекало за да стигнат во Пекинг, еден ден после настапот. Случајот допрва ќе се разрешува, вели Георгиевски во гостувањето на Утрински брифинг.

Во разговорот се вклучи и аналитичарот и новинар Дејан Андоновиќ кој истакна дека Путин ја повтори историјата со завршувањето на Олимписките игри да прави анексија на тероитории. Прво во Грузија, па потоа во Украина.

Целиот разговор погледнете го во видеото: