Тексашкиот институт за срце (THI) и „BiVACOR“, компанија за медицински уреди, во четвртокот објавија дека успешно ја извршиле првата човечка имплантација на вештачкото срце (TAH) на BiVACOR во рана физибилити студија (EFS) на Американската администрација за храна и лекови (FDA), објавена на 9 јули 2024 година.

Вештачкото срце на BiVACOR е бивентрикуларна титаниумска ротациона пумпа за крв со еден подвижен дел што користи магнетски левитирачки ротор кој пумпа крв и ги заменува двете комори на срцето, објави Тексашкиот институт за срце на својата веб-страница.

Првата клиничката студија кај човек има за цел да ја оцени безбедноста и перформансите на BiVACOR TAH како решение за пациенти кои чекаат трансплантација со тешка бивентрикуларна срцева слабост или унивентрикуларна срцева слабост кај кои не се препорачува поддршка на левата комора.

По оваа прва имплантација, која беше завршена во Медицинскиот центар „Бејлор Сент Лук“ во Медицинскиот центар во Тексас, уште четворица пациенти ќе бидат вклучени во студијата.

„Институтот за срце во Тексас е воодушевен од револуционерната прва имплантација на BiVACOR TAH. Бидејќи срцевата слабост останува водечка причина за смрт на глобално ниво, BiVACOR TAH нуди надеж за безброј пациенти кои чекаат трансплантација на срце“, рече д-р Џозеф Роџерс, претседател и извршен директор на Институтот за срце во Тексас.