Италијанската кујна е една од најпопуларните во светот, а тестенините, пиците и колачите се застапени во повеќето земји.

Меѓутоа, покрај тие јадења, не можеме, а да не ги спомнеме брускетите, кои се одлична и лесна опција за предјадење или аперитив.

Брускетите се традиционално италијанско јадење кое се состои од препечен леб, обично тостиран или печен на скара, прелиен со свежи домати, лук, маслиново масло и сол.

Денеска, сепак, ви предлагаме еден необичен рецепт за брускети од – карфиол.

Може да се збогатат со разни додатоци како сирење, шунка, зеленчук или сос од босилек. Овие вкусни залаци ја комбинираат крцкавата, но сепак, мека текстура на карфиолот со богатите ароми на медитеранската кујна.

Ова е одличен рецепт за предјадење пред секој оброк, а подеднакво ќе уживате и ако ги јадете како ужина или дури и лесна вечера.

Состојки:

– 1 поголем карфиол (околу 600 грама)
– 2 лажици маслиново масло
– 1 чешне лук
– малку сол
– 200 грама кашкавал (полутврд)
– 2 лажичиња мелена црвена пиперка
– шарен бибер
– 3 млади кромитчиња
– песто од суви домати

Подготовка:

Карфиолот исечете го на листови како шницли со дебелина околу 1 см. Наредете ги во тава обложена со хартија за печење.

Во еден сад измешајте ги маслиновото масло, изгмечениот лук, црвената пиперка, солта. Оваа мешавина со четкичка  премачкајте ги парчињата карфиол.

Ставете ги да се печат во загреана рерна на 220 степени Целзиусови, околу 10 минути. Потоа, превртете ги и печете ги уште 10 минути.

На уште врелите парчиња карфиол ставете од изренданиот кашкавал, посипете со ситно сечканиот млад кромид и ставете по 1 лажица од пестото од суви домати.

Послужете ги топли.