Премиерката на Херцеговачко-неретванскиот кантон (ХНК) Марија Бухач денеска соопшти дека има жртви во поплавените области во општините Јабланица, Коњиц, Фојница и Крешево.
Според неофицијални информации до кои дојде порталот Klix.ba, бројот на загинати во поплавите и одроните во Јабланица е зголемен на над 10 лица. Информацијата на сараевскиот портал засега не е потврдена, пренесува Блиц.

Бухач истакна дека силно невреме ја погодило северната област на ХНК, која е поплавена и отсечена. Таа додаде дека Владата на ХНК побарала помош од оружените сили на БиХ, а се бараат хеликоптери за спасување на дете во Јабланица.

Министерот за одбрана на Босна и Херцеговина Зукан Хелез во програмата на Ал Џезира откри дека 20 лица загинале во катастрофалните поплави и одрони во оваа земја.
„Издадовме наредба за војската и хеликоптерите. Испратив барање до командантот, што е кратка процедура и треба да биде одобрено. Мораме да евакуираме едно дете“, изјави за Кликс министерот за одбрана на БиХ, Зукан Хелез.
Во тој дел на БиХ, поради поплавите, блокирани се многу патишта, а на населението му е препорачано да не патува.
Во текот на денот ќе биде одржана итна седница на Советот на министри на БиХ.