Со свирчиња, транспаренти, македонски знамиња и извици „Не за рудници“ стотици еко-активисти и граѓани, во присуство на претставници на општинската управа, претставници на црквата го почнаа протестот против одлуката на владата да ги спои концесиите и да дозволи во Иловица да профункционира рудник.

Протестот почна денеска во Струмица во близина на „Глобал“ а според најавите протестите ќе продолжат и во иднина заедно со кривични пријави, герила акции и борба на сите нивоа од општините, до највисоките инстанци на власта. Присутните ја запалија одлуката на владата со која се дозволува спојување на концесиите.

– Немојте да мислите дека ќе се отвори рудник, зашто тоа ќе доведе до отворени насилни судири и дестабилизација на државата. Такво нешто никогаш нема да има, рече еден од демонстрантите по што останатите извикуваа „Стоп за рудници, стоп за Иловица“.

Активистите го нарекоа спојувањето на концесиитее „криминален заговор против сите граѓани на Македонија“. Побараа да биде одземена концесијата и да нема рудник. Критики упатија и кон ВМРО-ДПМНЕ и СДСМ и кон ДУИ.

– Се појавија луѓе како со факел во пештера почнаа да ја осветлуваат вистината дека рудниицте се најголемо зло кое може да не снајде.  Најголемата битка на секој човек која секој човек мора да ја издвојува е дека „тие таму горе така решиле и така ќе биде“. Човеку, разбуди се, нема време за рамнодушност, рече друг говорник на протестот.

Додадоа дека не е време за апатија и рамнодушност и дека борбата против рудникот ќе се води на сите можни нивоа, од општинските совети до централната власт.

– Ако мислите дека ќе не фатите на кондиција, грешка ви е сметката напротив со секоја скандалозна одлука било на влада, или на суд отпорот станува се поголем а нашите поддржувачи се побројни, се обратија присутните и додадоа дека избраниците од власта мора да работат за луѓето а не против нив.

– Истото важи и за големите политички играчи кои имаат моќ да стават крај на рудникот им порачуваме дека ќе се бориме до крај и ќе ја зачуваме природата за следните поколенија како што нам ни ја дале нашите предци, рече еден од присутните.

Милена Зафирова, претставничка на иницијативата „Здрава котлина“ рече дека солидарноста човечноста и колективната свест се хероите во нивната борба заедно со љубовта кон татковината.

– Само народ ќе го сопре овој рудник. Тоа се случува денес. Нема да има рудник. Влада, премиер, министри, политичари, судии корумпирани, 30 години понижување делби, крадење на се што можеше да се краде, посегнавте по воздухот, водата, почвите! Решивте измачениот земјоделец да го докусурите, нашите чесни и намачени земјоделци, луѓето со земја под ноктите кои ги вадат најчистите пари, кои работат како мравки, ја полнат кошницата со највкусните плодови посегнавте по струмичка котлина, рече Зафирова.

Друг присутен се обрати до јавноста со критики за идејата на СДСМ да се одржи референдум за тоа дали треба да се отвори рудник.

– Ајде да спроведеме еден референдум, ние присутните овде и погласно, зашто владата е малку тврда на ушите. Дали сакате да има рудник?, праша тој, по што присутните одговорија негативно.

Протестот во живо може да го следите овде.