Утринава пред да започне главната расправа за пожарот во модуларната болница, пред Основниот суд во Тетово жители на Тетово одржаа мирен протест за подршка на доктор Бобан Вучевски еден од обвинитети кој јавното обвинителство го товари за кривично дело непостапување според здравствени прописи за време на епидемија.

Докторот беше достапен за пациентите 24 часа, наместо да биде награден, тој излезе како жртва, велат тетовци. Посочија дека вината за пожарот треба да се бара на друго место.

„Дојдени сме да му дадеме целосна подршка на доктор Бобан Вучевски, оти тој нема никаква вина, вината треба да се бара на друго место кај правиот виновник. Тука настанала техничка грешка, а докторот нема никаква врска со таа техничка грешка, ова е само да се префрли вината на некој што не е виновен. Овој доктор наместо да биде награден, кој даваше се од себе, тој фактички испадна жртва. Треба праведно да се суди и да се казни тој што е виновен, затоа што техничкиот прием не го прави докторот, туку се знае кој треба да провери дали болницата е исправна или не. Жалосно за тие жртви, сочувство до семејствата, но овој доктор сметам дека треба да биде награден, оти бил достапен за сите пациенти 24 часа“, рече една учесничка на протестот.

Дел од учесниците сметаат дека протестот треба да има поголема подршка од граѓаните, оти доктор Вучевски помагал на сите, без разлика на верска и национална припадност.

„Доктор Бобан Вучевски цело време е со нас, никогаш не ни рекол не, на секој повик се јавувал, каде што требаше, тој беше присутен. Само сум зачудена што нема многу народ, затоа што ова нема врска, ниту со верска ниту со било каква припадност, оти има многу браќа и сестри Албанци на кои има помогнал, а не ги гледам никаде, а има и Македонци кои доктор Бобан ги спасил, но сега се во мал број,“ вели друга тетовка.

Пред да започне судската расправа, пред Основниот суд Тетово изјава даде роднина на еден од загинатите во пожарот во модуларната болница, кој посочи дека има и други виновници кои не се седнати на обвинителната клупа.

„Ние денеска дојдовме на ова судско рочиште, семејства сме на загинатите, во оваа држава нема правда, немало и нема да има правда. Има други лица кои треба да бидат обвинети за пожарот, икс министри ги знаат кои се, тие треба да дојдат овде и да ја кажат вистината како е изгорена модуларната болница за 5 до 7 минути. Ние бараме правда, и ќе одиме до крај. Има уште други виновни за пожарот во модуларната болница, не ги знам јас по име и нема потреба да се кажуваат по име, ги знае државата кои се има уште и треба да излезат пред лицето на правдата“, изјави Мумин Исмаили роднина на еден од загинатите во пожарот во модуларната болница.

Денешната главна расправа за случајот со пожарот во модуларната ковид болница во Тетово се одложи, бидејќи во судницата во Судот во Тетово не пристигна еден од обвинетите Артан Етеми. Неговата одбрана извести дека обвинетиот е во тешка здравствена и психичка состојба бидејќи починала неговата мајка.

Новото рочиште судот го презакажа за 31 јануари во 10 часот.

На обвинителна клупа за пожарот во модуларната болница се директорите Фљорин Бесими и Артан Етеми, докторот Бобан Вучевски и претставник на Клиничка болница Тетово како правно лице.

Се одложи судската расправа за пожарот во модуларната болница во Тетово