Во денешното издание на поткастот „Политиканти.мк“, Сашо Орданоски и Борјан Јовановски прават преглед на неделата што измина, со некое длабоко претчувство за неделава што следува. Изборите се на прагот, партиите прават свои стратегии водени од свои есапи. Она што е забележливо е дека Ахмети ги интегрира помалите партии од различни помали етнички заедници, додека ВМРО тера национализам, а СДСМ е хронично неефикасен. Зошто е тоа така? Какви ќе бидат последиците и ефектите? Може ли ВМРО-ДПМНЕ на крајот да остане изненадена? – анализираат „Политиканти“.

Реално, ако сакате да прочитате што нудат двете најголеми партии ќе треба да ги надминете „програмските“ трикови – односно програмата на ВМРО-ДПМНЕ е 340 страници, а на СДСМ е недостапна ама ќе ја бидне, како што велат на партиската интернет страница.

Дали некогаш ВМРО-ДПМНЕ ќе се откаже од поистоветување на оваа партија со Македонија? Македонија е на македонските граѓани, кои и да се, какви и да се, каде и да припаѓаат етнички или политички, велат „Политиканти“ во својата денешна анализа.

Од анализата на партиските сајтови „Политиканти“ заклучуваат дека: ВМРО е изгубена по „патот“, СДСМ – во времето, а ДУИ – во преводот.

А може ли Македонија да ја реши сама корупцијата, па потоа да влезе во ЕУ или е тоа илузија и демагогија?

Избори викендот имаше и во Турција. На нив загуби Ердоган. Што е тоа што може да се научи од ваквиот исход на изборите? Кои се петте клучни точки кои важат и за кај нас?

За ова и многу повеќе во новото издание на поткастот „Политиканти.мк“. на „Слободен печат“.