Повеќе од 1.000 сребрени и 5 златни монети, во вкупна вредност од околу еден милион долари, биле пронајдени од екипажот на американскиот брод „Џаст рајт“. Монетите завршиле на дното на морето при шпански бродолом во 1715 година, соопшти компанија за спасување бродови.

Ова богатство од повеќе од 1.000 сребрени монети е пронајдено во близина на делот од Флорида познат како крајбрежјето Баунти, додека пет златни монети, ескудоси, се пронајдени во посебен наод, објавува „Си-ен-ен“.

Во соопштението од компанијата „Кралицата Жил“ се вели дека е откриен дел од „огромното богатство што го носела флотата од Новиот свет назад во Шпанија“, која била погодена од ураган на 31 јули 1715 година. Компанијата соопшти дека историчарите проценуваат дека околу 400 милиони долари во злато, сребро и накит биле изгубени во бурата.

– Ова откритие не е важно само за богатството, туку и за приказните што ги раскажува. Секоја монета е дел од историјата, опиплива врска со луѓето кои живееле, работеле и пловеле за време на златното доба на Шпанската империја. Пронаоѓањето на 1.000 од нив во едно откритие е ретко и извонредно – изјави директорот за операции на компанијата, Сал Гутуцо.

Компанијата соопшти дека има ексклузивни права за спасување на остатоците од бродоломот.

Во соопштението, од компанијата „Кралицата Жил“ наведуваат дека монетите биле ковани во шпанските колонии Мексико, Перу и Боливија.

– Состојбата на монетите сугерира дека тие биле дел од еден сандак или пратка што се истурила кога бродот се распаднал во бесот на ураганот. Пронајдените монетите ќе бидат внимателно зачувани пред да бидат изложени на јавна изложба. Во тек се планови за изложување на избрани парчиња во локалните музеи – се вели во соопштението.

На 24 јули 1715 година, флота од 11 бродови отпловила од Хавана кон Шпанија за да ги испорача „Накитот на кралицата“ – накит и злато во вредност од најмалку 400 милиони долари, од кои сите биле изгубени на море за време на ураган покрај брегот на Флорида на 31 јули 1715 година.

Државниот закон налага богатството да му припаѓа на Окружниот суд на САД во Флорида, а државата ќе го процени богатството и ќе задржи 20 проценти од неговата вредност, додека преостанатите 80 проценти ќе бидат поделени меѓу оние што ќе го пронајдат.