ВИДЕО | Поплави и бури ја погодија Јужна Европа
Две лица загинаа во Франција и Шпанија, а стотици беа евакуирани откако бури, обилни врнежи и пожари погодија големи делови од Јужна Европа. Властите предупредуваат дека екстремните временски услови, засилени од климатските промени, создаваат сè посериозни ризици за населението.
Препорачано
-
1
-
2
-
3
Во северозападна Франција, 55-годишна жена го загуби животот откако нејзиниот автомобил бил однесен од ненадејни поплави во градот Плумагоар. Пожарникарите само во регионот Кот-д’Армор примиле околу 1.500 повици за помош и интервенирале повеќе од 400 пати. Градот Плуа за 18 часа доби над 150 милиметри дожд, а делови од Марсеј и околните градови останаа без електрична енергија. Поради бурите, натпреварот помеѓу Олимпик Марсеј и ПСЖ беше одложен, а летови во Марсеј беа пренасочени или откажани, пишуваат медиумите.
Major flooding due to extreme rainfall in Marseille, France 🇫🇷 (21.09.2025) pic.twitter.com/iOiLnj1X3G
— Disaster News (@Top_Disaster) September 21, 2025
Во Шпанија, пак, поројните дождови во Каталонија однесоа автомобил со две лица. Телото на едно лице беше пронајдено во река во Сант Пере де Риудебитлес, додека потрагата по второто продолжува. Поплавите предизвикаа прекин на приградските железнички линии и одложување на десетици летови во Барселона. Истовремено, во Галиција беа регистрирани шумски пожари кои изгореа повеќе од 1.400 хектари шума.
Силен удар претрпе и северна Италија, каде што обилните дождови го излеаја коритото од реката Севесо во Милано и околните населени места. Пожарникарите и армијата интервенираа во Ломбардија и Лигурија, а училиштата во регионот останаа затворени. Возовите беа суспендирани од безбедносни причини, а жителите предупредени да избегнуваат подземни простори и поплавени улици.
Severe flooding is hitting Meda in Lombardy, Italy, and the situation is worsening day by day. pic.twitter.com/HIRg8KQMRE
— Weather Monitor (@WeatherMonitors) September 22, 2025
Експертите алармираат дека климатските промени го зголемуваат ризикот од екстремни временски услови – атмосферата задржува сè повеќе влага, што придонесува за поројни врнежи и ненадејни поплави. Според нив, Јужна Европа во иднина може сè почесто да се соочува со комбинација на поплави, пожари и свлечишта, каква што беше забележана изминативе денови.
