По повеќе од 50 години поминати во заробеништво, орката Лолита конечно ќе може да го помине остатокот од својот живот во Пацификот.

Лолита, најстарата орка во заробеништво, е земена од нејзиниот дом во Тихиот Океан кога имала само четири години, а сега после 50 години се подготвува конечно да биде ослободена и вратена во нејзината природна животна средина.

По притисокот поради загриженоста од страна на борците за правата на животните, од Морскиот аквариум во Мајами објавиле на прес-конференција дека планираат да го ослободат „Нежниот џин“, тежок повеќе од 2260 килограми.

Како резултат на децениските протести и пропаднати тужби, непрофитабилната организација „Френдс оф Токи“ (Лолита порано ја викале Токита), конечно успеале да потпишат договор со морскиот аквариум за да ја ослободат орката. Релокацијата на Лолита ќе добие финансиска помош од филантропот и сопственик на „Националната фудбалска лига„ Џим Ирсеј.

Иако до преселувањето би можело да поминат 24 месеци и да чини околу 20 милиони долари, плановите во моментов се насочени кон тоа Лолита да биде вратена на северозападниот дел на Пацификот, каде што првично ќе биде под грижа на тренери во затворено светилиште. Таму ќе биде научена да лови и ќе ѝ помогнат да ги развие мускулите, со што подобро ќе ја опремат за живот во дивината.

Минатата година, 57-годишната орка се повлече од настапи, а моментално живее во резервоар со димензии 24 на 11 метри.

„Тоа е чекор кон обновување на нашата природна средина, поправање на она што го измешавме со експлоатацијата и развојот. Мислам дека ќе биде возбудена и среќна што ќе биде дома, тоа е нејзиното старо соседство“, рече претседателот на одборот на адвокатската групата „Орка нетворк“, Хауард Гарет.

Позната како претставник на јужните китови убијци, Лолита е член на загрозена група орки кои живеат во водите меѓу Вашингтон и Канада, каде што се смета дека останале само 73 вакви единки. Групата претрпела значително намалување на популацијата во 1960-тите и 70-тите кога биле заробени 45 орки, вклучувајќи ја и Лолита, и испорачани во забавните паркови ширум светот.

И покрај импресивната возраст на Лолита, се смета дека нејзината речиси стогодишна мајка е една од ретките преостанати орки кои сè уште пливаат по северозападните води на Тихиот Океан, а припаѓаат на кланот наречен „L pod“. Годините на нејзината мајка им дадоа надеж на нејзините застапници дека и Лолита може да има уште многу години слобода пред неа.