Фудбалерите на Евертон и Ливерпул денеска во Мерсисајд дербито ремизираа без голови (0:0) на стадионот „Гудисон Парк“ во шестото коло од Премиер лигата.

Беше доста возбудливо уште од самиот старт на натпреварот, темпото беше брзо, со не многу шанси на почетокот, но многу фаули и стартови на работ на жолти картони. За ова придонесе и судијата Ентони Тејлор, кој дозволи поцврст фудбал и не ја прекинуваше играта. Можеше да има многу голови, но голманите на двете страни беа исклучителни и на крајот не видовме промена на резултатот.

Шансите почнаа да се создаваат дури во средината на првото полувреме кога прв се закани Евертон. Дирекот беше погоден од Дејвис. Не долго потоа следеше одговорот на Ливерпул. Дарвин имаше долг пас по десната страна за да ја спушти топката со гради и од полуволеј одлично шутираше, но Џордан Пикфорд го одби ударот кон пречката. Во следниот напад Луис Дијаз ја погодува стативата.

Thanks Pickford pic.twitter.com/1xYQmYvHSR

— Loony Toffee (@minnuweekly) September 3, 2022

Тоа навестуваше дека нешто слично можевме да видиме и во продолжението на средбата. Ентони Гордон беше убедливо најопасниот играч на Евертон, додека на спротивната страна изостана настапот на Мохамед Салах. Египќанецот сезонава не блеска кога се во прашање индивидуалните настапи.

Ливерпул многу подобро го отвори второто полувреме. Роберто Фирмино влезе на местото на Фабио Карваљо, кој доби непријатен удар во еден од дуелите, а делуваше зад Нуњез. Шансите за гостите постојано доаѓаа преку Цимикас, Фирмино, Нуњез и Фабињо, но Џордан Пикфорд бранеше апсолутно феноменално. Евертон се закани од контра, имаше ситуација „пет на три“, но Алисон на другиот крај одговори подеднакво одлично.

Conor Coady's goal ruled offside pic.twitter.com/by0j5xbeRE

— Arsalan (@arsalanfcb_) September 3, 2022

Неколку минути подоцна тежиштето на натпреварот беше во половината на Ливерпул, Евертон имаше одмор по кој Конор Коди постигна гол во судиското продолжение. Поранешното дете на Ливерпул се радуваше исто како и цел стадион, но ВАР потврди дека беше во офсајд.

До крајот на мечот Алисон и Пикфорд повторно блеснаа со нови обрани и спречија нивната мрежа да се затресе на оваа средба. Салах ја погоди стативата во 96. минута, што беше последна шанса на натпреварот.

Евертон и натаму без победа во оваа премиерлигашка сезона, а од друга страна, Ливерпул ја прекинува серијата од две победи и продолжува да заостанува зад Арсенал и Манчестер сити.