Портпаролот на Владимир Путин, Дмитриј Песков вечерва даде интервју за британски Скај. За време на интервјуто, тој негираше дека руските сили извршиле воени злосторства во Украина, на што новинарот Марк Остин го праша дали Русија ќе соработува со истрагата на Меѓународниот кривичен суд за воените злосторства во Украина.

Песков одговори дека Русија не го поддржува и не го признава Меѓународниот кривичен суд, додавајќи дека „Русија не е единствената земја во светот што го прави тоа“.

„Ние сме заинтересирани за независна и објективна истрага за сите злосторства“, рече Песков, додавајќи дека Русија „сака да знае каков ќе биде форматот на таква истрага бидејќи имаме горчливо искуство со меѓународните истраги“.

Watch live: Sky's @MarkAustinTV interviews Vladimir Putin's press secretary Dmitry Peskov as Russia is accused of committing war crimes during its invasion of Ukraine https://t.co/X3flQUBL0r https://t.co/QNi7qp0fkD

— Sky News (@SkyNews) April 7, 2022

Новинарот потоа го праша дали Владимир Путин е загрижен дека може да заврши на суд.

„Не, не е. Не гледаме никакви шанси тоа да се случи“, рече Песков.

„Русија загуби многу животи во Украина“

Тој рече дека историјата на Украина се променила во 2014 година за време на, како што го нарече „нелегалниот пуч“.

„Украина стана антируска, сè што се случи во Украина потоа беше насочено против нашата земја“, рече Песков, додавајќи дека Русија „со децении била загрижена за сопствената безбедност“.

Запрашан од новинарот дали војната се покажа како понижување за Русија со оглед на бројот на загинати војници, тој рече: „Не, тоа е погрешна слика за тоа што се случува“. Но, тој веднаш призна: „Имаме значителна загуба на војници. Тоа е огромна трагедија за нас“.