Осумгодишно дете вчера попладне било нападнато од куче во сопственост на соседите во скопската населба Пинтија. Детето веднаш било префрлено во Градската општа болница, но за жал им подлегнало на повредите. Увид на местото на трагичниот настан денеска изврши и јавен обвинител.

Екипа на „Слободен печат“ ја посети населбата, но поради сензитивноста на случајот, соседите не сакаа да зборуваат пред камерата. Откако ја исклучивме, подетално ни кажаа за случајот.

Сопственикот на домашното куче од расата англиски булмастиф бил професионален одгледувач на кучиња од оваа раса, а како што самиот се преставува, и „консултант во индустријата со канабис“.

Агенцијата за храна и ветеринарство во соработка со надлежните од МВР и ветеринар работи на расчистување на случајот.

– Лично како човек и како директор на АХВ изразувам најдлабоко жалење за трагедијата во кој згасна млад човечки живот. Од направениот увид утврдено е дека во немилиот настан учествувале две кучиња кои имаат сопственик. Кучињата се уредно идентификувани со микрочип и тие сега се изолирани и ставени под надзор на официјален ветеринар. Дворот во кој се чуваат кучињата е соодветно заграден и на влезот е поставен предупредувачки знак за присуство на куче – изјави директорот на АХВ Николче Бабовски.

Според официјалните информации од МВР, вчера околу 18:25 часот во ГОБ „Св. Наум Охридски“ било пријавено дека кај нив е донесено дете од Скопје, кое според пријавеното починало од повредите нанесени во напад од куче во сопственост на соседот Н.Г.