Жителите на урбана населба во Чонгкинг, град во југозападна Кина, со години минуваа покрај две станбени згради изградени на стрмна падина, не знаејќи дека под нив лежи огромна статуа издлабена во карпа.

Градежниците неодамна ја открија оваа импозантна статуа без глава, висока околу 9 метри, сосема случајно за време на реновирањето на станбениот комплекс, објави локалната власт на областа Нан’ан.

Експертите сметаат дека статуата е изградена во периодот на Република Кина (1912 – 1949). Неговата глава најверојатно била уништена во текот на 1950-тите, а станбените згради околу неа биле изградени во 1980-тите. Тие веруваат дека не станува збор за будистичка статуа, туку дека е поврзана со народната религија. Имено, покрај статуата порано постоел храм посветен на таоистичкиот бог на грмотевиците, иако бил демонтиран во 1987 година.

Фотографиите и видеата од оваа мистериозна статуа веднаш станаа вирални на кинеските социјални мрежи, а многумина ја опишаа како „Буда“, пишува Си-Ен-Ен. Статуата сега е само делумно покриена со мов, и прикажува фигура како седи и држи кружен камен во рацете. На статуата се видливи наборите и некои други детали за облеката.

На многумина не им е јасно како зградите можеа толку брзо да ја покријат историската статуа, која сè уште беше позната до 1997 година и која во весниците беше наведена како културна реликвија. Тие ја обвинуваат забрзаната урбана експанзија што се случи во Чонгкинг.

Во последните децении, во тој град се градеа згради за зголемено население од над 30 милиони луѓе, што понекогаш се случуваше на штета на историските и културните места. Градот е распослан над планините и многу згради се изградени на падините.