Американецот Ти Џеј Шортс се наоѓа на списокот на селекторот Александар Јончевски за ноемврискиот циклус, и домашните мечеви со Норвешка на 10-ти и Данска на 13-ноември во Гевгелија.

Намерата на стручниот штаб на македонската сениорска селекција и на раководството на федерацијата, да натурализира плејмејкер кој ќе помогне во наредниот период, а почнувајќи од вториот круг на претквалификациите за Европското првенство во 2025 година се остварува со ангажманот на Ти Џеј Шортс.

Американски плејмејкер кој од пред неколку месеци е член на бундеслигашот Телеком Бон, а и претходните две сезони играше во германското првенство. По една сезона помина во Хамбург Тауерс и Краилсхајм Мерлинс, а првата професионална година во европската кошарка ја помина во летонскиот Вентспилс.

Минатата сезона беше најдобар стрелец (20,6 поени) и играч со највисок просечен индекс во Бундеслигата (22,3).

ФАКТИ ЗА ТИ ЏЕЈ ШОРТС

Има 25 години, висок е 175 сантиметри и оваа сезона игра фантастично во дресот на Телеком Бон кој по првите четири кола од Бундеслигата има максимален ефект. Шортс просечно постигнува по 17 поени, 7 асистенции и 2 скока, со индекс 16 и е најефикасен и играч со највисок ефект во својата екипа. За тројка шутира со над 50% (8/15), а вкупно од поле со 44% (15/34).

Се истакнува и со играта во одбрана бидејќи просечно бележи по 1,3 украдени топки со што е втор во тимот на Телеком Бон. Во Лигата на шампионите е уште подобар, на три натпревари просечно постигнуваше по 26,7 поени и 7,7 асистенции со индекс 29,3.