За луѓето, насмевката е лесен начин да се избегнат недоразбирањата. Делфините можат да користат слични тактики додека играат.

Делфините ја отвораат устата за време на играта за да направат израз сличен на насмевка, пишува „Си-ен-ен“ (CNN).

Научниците од Италија и Франција гледале 11 делфини во зоолошка градина во Рим и уште 11 во зоолошка градина во западна Франција како си играат едни со други, со луѓе и сами.

Истражувачите откриле дека овие морски цицачи се „насмеале“ речиси секогаш кога биле во видното поле на својот другар за игра, додека нивниот партнер се „насмевнувал“ една третина од времето. Ова укажува на некаква форма на комуникација, велат истражувачите, претпоставувајќи дека насмеаните делфини спречуваат играта да се претвори во вистински конфликт поради недоразбирање.

Сепак, иако нивниот израз наликува на насмевка, Хедер Хил, професорка по психологија на Универзитетот Сент Мери во Сан Антонио и експерт за комуникација со делфините, предупредува да не се донесуваат избрзани заклучоци.

„Мислам дека тоа е некаква форма на комуникација за време на играта, но не би го нарекла насмевка, бидејќи отворената уста се користи во многу други ситуации“, вели таа, укажувајќи на нејзината употреба во агресивни, осамени и весели ситуации.

Луѓето ги сакаат делфините и често им даваат човечки карактеристики. Делфините се познати по својата разиграност, богат социјален живот и сложена комуникација.

И покрај оваа веселост, изразите на лицето на делфините за време на играта не биле претходно проучени, иако студиите откриле дека другите цицачи, како што се луѓето и мајмуните, комуницираат преку отворена уста, изрази на насмевка за време на играта. Експертите веруваат дека ваквото однесување произлегува од модифицирана процедура на гризење без вистински контакт.

Истражувачите откриле дека 92 отсто од изразите со отворена уста се случиле кога делфините си играат едни со други, а не со луѓе или сами.

Кога делфините влегле во агресивна интеракција или порелаксирана активност како што е пливање рамо до рамо или пливање наопаку, научниците не забележале „насмевка“.

Беше истакната и важноста на вокалната комуникација на делфините за време на играта, што може да биде предмет на идни истражувања бидејќи овие сигнали не беа снимени. „Делфините развија еден од најсложените гласовни системи во животинскиот свет, но звукот може да ги изложи на предатори или прислушување“, велат истражувачите.

Кога играат заедно, комбинацијата на звучни и визуелни знаци им помага на делфините да соработуваат и да постигнат цели, што е особено корисна стратегија за време на друштвените игри кога тие се помалку претпазливи за предаторите.

Сите набљудувани делфини живеат во заробеништво. „Насмевката“ веројатно се случува и во дивината, но можеби поретко, бидејќи тие поминуваат повеќе време во потрага по храна или избегнување на предатори, вели проф. Рид.

Следниот чекор е да се проучат делфините во дивината за да се види што прават во истите типови на ситуации.