Емили Остин докажа дека мајчинската поврзаност ги надминува сите разлики меѓу живите суштества, откако таа и женката горила од Зоолошката градина во Бостон една на друга си ги покажаа своите потомци. Видеото од оваа необична средба, објавено на Јутјуб, набрзо стана вирално, пишува „Њујорк пост“.

– Едноставно бев шокирана – рекла Емили.

Средбата со мајката горила ја снимил нејзиниот сопруг Мајкл. Двајцата биле во обиколка на бостонската Зоолошка градина „Френклин Парк“ со нивниот петмесечен син Кањон, кога ги забележала мајка горила по име Кики.

– Нѐ набудуваше од нејзината пештера и помислив дека гледа во Кањон – рекла Емили и додала дека Кики околу 5 минути мавтала и гледала во синот кој го држела во раце.

На Емили на почетокот не ѝ било јасно што прави Кики додека и таа не го зела својот седуммесечен син Пабло и го кренала до стаклото од нејзиното живеалиште за да ѝ го покаже на Емили. Заедно со Пабло, Кики има уште четири ќерки.

Емили и Кики си ги покажувале децата низ стаклото, а Кики ја кренала раката на стаклото како да се обидува да го земе за рака малиот Кањон.

– Нејзиното лице беше полно со љубов. Му го покажуваше своето младенче на моето бебе – рекла воодушевената Емили.

Малиот Кањон ја преспал оваа единствена средба.

– Кога дојдовме тој ден во Зоолошката градина, не ни сонував дека ќе имаме можност да доживееме вакво нешто – изјавила Емили.