Германската министерка за Европа и климатски прашања Ана Лирман, се огласи преку социјалните мрежи откако денеска Владата на Република Српска ја прогласи за персона нон грата, а таа од Бања Лука беше со полиција испратена до границата и надвор од територијата на босанско-херцеговскиот ентитет.

„Денес бев во Бања Лука, во Босна и Херцеговина. Тоа е убав град со одлични луѓе. Луѓето што ги запознав таму топло ме прифатија. Имав голем број одлични средби со граѓанското општество и опозицијата. Сецесионистичките активности на Додик се неприфатливи. Кон крајот на мојата програма во Бања Лука, Додик повторно го покажа својот деструктивен пристап. Неговите претставници ни се закануваа на мене и на мојата делегација со насилство. Ова е знак на слабост. Додик е се поизолиран и нема поддршка од граѓаните на Република Српска. Добив многу пораки за поддршка од Бања Лука – луѓето се срамат од постапките на Додик. Јасно им порачувам на сите луѓе во Република Српска: Ние ќе продолжиме да бидеме со вас – на вашиот пат кон просперитет, кон стабилност и кон Европската унија“, вели Лирман во видеопораката.

View this post on Instagram

A post shared by Anna Lührmann (@annaluehrmann)

Откако беше прогласена за непожелна, Лирман ја откажа средбата што требаше да ја има во Бања Лука со лидерите на опозициските партии. Нејзината посета доаѓа на денот на кој Германија и Австрија официјално соопштија дека му забрануваат влез во нивните држави на лидерот на босанските Срби Милорад Додик.

Додик денеска изјави дека Лирман „кришум дошла за да се сретне со нејзините пулени“, во нова реакција преку социјалните мрежи беше уште погруб во речникот со кој ја опиша германската министерка.

„Не ми се верува дека е толку наивна што по сите лаги и навреди што ги изрече, само за да ја задоволи сараевската чаршија, очекуваше немо да ги набљудуваме нејзините постапки околу РС. Во дилема сум дали е нејзиниот ум или се раководела од умот на опозицијата. И двете се глупави“, напиша Додик во објава на „Икс“.