Лизгањето на земјиштето и обилните дождови што вчера ја погодија индиската хималајска држава Утаракханд однесоа најмалку 15 животи, додека 16 други се водат како исчезнати, објавија денес индиските медиуми.

Снимки покажуваат како калливи води го поплавуваат градот Сахастрандара, во округот Дехрадун, вчера, предизвикувајќи штети на продавници, патишта и домови, а граѓаните се принудени да бараат засолниште.

„Мојата продавница беше однесена од водата“, изјави еден жител за новинската агенција АНИ, додавајќи дека тоа е една од седумте продавници што ги однесе водата на пазарот.

„Нема никаква трага од нив“, додаде тој.

Вчера, службените лица пронајдоа 13 тела од Дехрадун и по едно од областите Питорагарх и Наинитал, објави весникот „Индијан експрес“.

Утаракханд често е погодена од поплави и лизгање на земјиштето, што некои експерти го припишуваат на климатските промени.

Во август, поплави и свлечиште го зафатија селото Дарали во оваа држава, а според властите, 60 лица сè уште се водат како исчезнати.