Македонската фудбаска репрезентација на денешен ден пред две години оствари историска победа во Дуизбург победувајќи ја Германија со 1:2.

Германците уште од почетокот на дуелот ја контролираа топката, веднаш го бркаа првиот гол, кружеа опасно од сите страни, но нашите фудбалери кои во одредени моменти имаа и среќа, ги запреа сите налети.

Во деветтата минута првата сериозна шанса ја имаа токму Германците, Хаверц правовремено го пронајде Горецка кој за наша среќа удри во пречката.

Гнабри, членот на Баерн во 27 минута се обиде од странична позиција да го изненади Димитриевски. Истиот играч и во 32 минута се најде во идеална позиција во нашиот казнет простор откако не реагиравме најдобро, но повторно за наша среќа топката заврши над голот.

Во 40 минута прва ретка можност за нашите фудбалери да се заканат, а тоа можеше многу лесно и да се реализира во погодок, прекрасен слободен удар од Алиоски, добро следеше Адеми кој малку ја потфати топката со глава, а со крајни напори одбрани Тер Штеген.

И кога конечно се ослободивме барем малку од силниот притисок, големо изненадување, непосредно пред паузата Енис Барди убаво го пронајде Пандев кој искусно и рутински стрелаше во мрежата на Тер Штеген за шок на Германците и тогашниот нивни селектор, Јоаким Лев.

Во 62 минута досуден еден сомнителен пенал, Сане според рускиот арбитар бил фаулиран од Алиоски, а сигурен од белата точка беше Гундоган. Во 74 минута Ристовски во вистински момент успеа да го блокира Кимих и да спречи евентуален пресврт на Германците.

Во следниот напад после еден изведен корнер на нашата репрезентација топката удри во раката на Џан, веднаш реагираа македонските фудбалери до судијата, но ништо не беше досудено, плус и Пандев доби жолт картон поради кој го пропушти следниот натпревар.

Уште една голема шанса пропушти Германија во наредниот напад, Вернер не реализираше од идеална позиција. Казната за Германците стигна во 85-тата минута кога Елмас погоди за историска победа.